2021-10-23 Fahisoi (Lequidoe) 2
Aileu, 23 outubru 2021 - Ministru ba Asuntus Parlamentares no Komunikasaun Sosiál (MAPKOMS), Francisco Martins da Costa Pereira Jerónimo, akompaña husi Sekretáriu Estadu Arte no Kultura (SEAK), Teófilo Caldas, no Sekretáriu Estadu Terras no Propriedades (SETP), Mario Ximenes, finda semana ne’e, hamutuk ho ekipa saúde hala'o advokasia vasinasaun kontra Covid-19 iha suku Fahisoi, postu administrativu Lequidoe, munisípiu Aileu. Iha atividade kampaña vasinasaun ne’e Ministru MAPKOMS haktuir katak, mundu ohin loron taxa mortalidade iha redusaun maka’as, mundialmente dadus provizóriu hatudu katak ema mate hamutuk 4.800.000 resin, maibé ho vasina komesa redús ona ema mate. Iha Timor-Leste, ema ne’ebé moras Covid-19 mós komesa menus, liuliu iha Dili moras ne’e nia númeru komesa minimiza lahanesan uluk, tanba Dili 80% hetan ona vasina ba primeiru doze, segundu doze to’o ona +70%. “Tamba ne’e fó ona ezemplu ba ita hotu katak, vasina mak sai xave importante tebes ba ita idak-idak atu proteje ita nia saúde, família, komunidade no ita nia nasaun, tamba ne’e laiha ona dúvidas ba ita hotu atu ba simu vasina, nune’e husu mós ba joven no inan-aman sira atu hakbesik an ba sentru saúde ne’ebé besik hodi simu vasina ne’e”, informa Ministru MAPKOMS. Iha fatin hanesan, Sekretáriu Estadu Arte no Kultura, Teófilo Caldas, informa mós katak “tradisaun hanorin ita atu fiar no rona malu, ho nune’e husu ba ita hotu atu labele dúvida no fó konfiansa tomak ba ita nia Estadu, ba ita nia Governu atu nune’e ema hotu-hotu bele asesu ba vasina hodi salva vida”. Ikus liu, Sekretáriu Estadu Terras no Propriedades, Mario Ximenes, reforsa katak “husu ba komunidade sira iha suku Fahisoi atu labele fiar informasaun falsa sira ne’ebé mak espalla husi pesoál irresponsabilidade sira, maibé fiar ba mídia kredível sira, liu-liu ba profisionál saúde sira hodi nune’e, ita hotu bele hakat ba postu saúde sira ne’ebé mak iha ona hodi simu imunizasaun kontra moras aat ne’e”. Provizoriamente, taxa partisipasaun ba programa imunizasaun kontra Covid-19 iha territóriu Timor-Leste hatudu katak, munisípiu Aileu okupa iha pozisaun da ualu ho % 61.5, enkuantu Covalima konsege tuur iha pozisaun dahuluk ho % 86,4 no Ermera mak okupa okupasaun ikus ho % 52,1. Marka mós prezensa iha kampaña ne’e, administradór postu Lequidoe, Diretór DNDI-MAPKOMS, Diretór Saúde Munisípiu Aileu, Komandante Eskuadra Postu Lequidoe, Reverendísimu Amu Pároku Lequidoe, lider komunitáriu, reprezentante veteranu, pesoál saúde no mós hetan partisipasaun másima husi komunidade sira.
MÍDIA_MAPKOMS
Relevante Bilder
_2.jpg?uselang=de){kind=link}
Relevante Artikel
Lequidoe (Verwaltungsamt)Lequidoe ist ein osttimoresisches Verwaltungsamt in der Gemeinde Aileu. Verwaltungssitz ist Namolesso im Suco Namolesso. .. weiterlesen