2021-06-05 Fatubessi 5
FATUBESSI, 04 JUNNU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, iha Sesta-feira loraik ne’e hala’o inspesaun hodi haree direita progressu servisu ba rehabilitasaun estrada munisipál husi Ermera to’o Fatubessi munisípiu Ermera nian ne’ebé daudauk ne’e atinji ona pursentu 61,16 (61,16%). Iha inspesaun ne’e, konsultór no kontratór informa problema no preokupasaun liga ho komunidade iha área afeitadu ne’ebé ladún koopera hodi fasilita konstrusaun estrada ne’e ho di’ak, nune’e Sr. Ministru husu ba komunidade afeitadu diresaun estrada Ermera ba Letefoho atu koopera nune’e estrada ne’e bele remata ho kualidade ne’ebé di’ak. “Ha’u atu enkamina hela PMU, konsultan ho kontraktór sira-nia preokupasaun, sira iha suporta husi ita-boot sira autoridade lokál maibé dala-barak ne’e komunidade ladún suporta intermus hanesan rai no hada hela fatuk ohin, aban mai fali fatuk sira ne’e ema foti hotu tiha, problema ho resentelmentu, la fó dalan, la fó bee, bee mós dehan tenke selu hotu buat sira ne’e, Sr. Liurai sira ko’alia ho ita-boot sira-nia xefe aldeia, komunidade dalaruma halo enkontru komunitáriu ruma, ajuda hela sira, estrada ida-ne’e halo ba ita-boot sira, projetu ne’e projetu grant, see amu sira, ita-nia komunidade halo hanesan ne’e oinsá mak halo projetu ne’e ho kualidade ba ita-nia moris di’ak, agora ita ejiji Governu, ita ejiji ita-nia estradu no parseiru atu mai halo dezenvolvimentu, agora halo tiha depois ita mak impata fali tan, ne’ebé husu ba Liurai sira-nia lideransa, lidera komunidade ko’alia ho sira, koordena ho sira atu bele koopera ho ita-nia kontratór sira, PMU, ho enjinéiru sira para bele lori projetu ne’e hotu lalais ho kualidade,”Sr. Ministru Obras Públikas hato’o ba autoridade lokál iha Fatubessi. Konstrusaun projetu ne’e presiza apoiu no kooperasaun husi komunidade atu nune’e kontratór no konsultór sira bele finaliza projetu ne’e ho kualidade, dura kleur ne’ebé la’os servé de’it jerasaun ida agora maibé serve mós ba oan no beioan sira iha futuru ba moris di’ak, selae projetu laiha kualidade komunidade mak sofre nafatin. Sr. Ministru mós husu ba kompañia kontratór no konsultór sira atu servisu ho kualidade, bainhira konstrusaun ne’e remata bele iha kualidade ne’ebé di’ak, fahe mós esperiénsia ba enjinéiru no traballadór timoroan ne’ebé daudauk ne’e servisu ho kompañia konsultór no kontratór, nune’e bainhira konstrusaun ne’e remata timoroan mós iha esperiénsia ne’ebé di’ak iha área konstrusaun. “Ita-boot sira enjinéiru (enjinéiru husi rai-liur) iha esperiénsia barak iha área konstrusaun, tanba ne’e husu ba ita-boot sira fahe ita-boot sira-nia esperiénsia ba enjiéiru timoroan tanba sira hanesan jerasaun foun presiza iha esperiénsia barak liután ba dezenvolvimentu Timor-Leste nian iha futuru,”Sr. Ministru hatete. Sr. Ministru mós husu ba enjinéiru timoroan atu pasiénsia no aprende ho enjinéiru sira husi rai-liur, atu nune’e bele sai hanesan bukae iha futuru. Tuir kontratu projetu ne’e hahú iha loron 10 fulan-novembru tinan 2019 no remata iha loron 7 fulan-Jullu tinan 2020, maibé to’o agora seidauk finaliza tanba kestaun polítika, pandémia COVID-19 inklui indiminizasaun ba komunidade afeitadu, maibé kompañia kontratór no konsultór daudauk ne’e sei halo servisu no esforsu hodi finaliza tiha projetu refere. Rehabilitasaun estrada Ermera-Fatubessi ho distánsia 11,81KM, ho orsamentu doasaun husi Uniaun Europeia no implementa ka jere husi Banku Dezenvolvimentu Aziátiku (ADB) montante millaun $ 4.294.258.10. Projetu ne’e konstrui husi kontraktór Shanghai Construction Group CO.LTD (SCG) no konsultór maka kompañia Konsultan International Co. LTD husi Korea, Korea Engineering Cunsultant Corp.LTD no Lea Associates Solth Asia PVT.LTD.
Vizita traballu ne’e, Sr. Ministru akompaña husi Diretór Jerál Administrasaun no Finansas (DJAF), Sr. Januário Barbosa, Prezidente Institutu Jestaun Ekipamentu (IJE), Sra. Hermengilda D. C. Laurentina ho vogál sira, Jestór Unidade Manajementu Projetu (PMU). Sr. Sidónio Freitas Amarál, inklui tékniku sira hala’o mós vizita ba Igreja Fatubessi.
Relevante Bilder
.jpg)
_suco.png)
Relevante Artikel
Fatubessi (Hatulia B)Fatubessi ist ein osttimoresischer Suco im Verwaltungsamt Hatulia B. .. weiterlesen